O’Brien i nis takimet me ballkanasit në Paris, Kovachevski tregon çfarë foli me të

Në margjina të këtij forumi, ai ka në agjendë edhe takimet me disa liderë ballkanikë. Të parin e nisi me kryeministrin e Maqedonisë së Veriut, Dimitar Kovachevski, ndërsa më pas pritet të takojë edhe kryeministrin Albin Kurti.

Për takimin me O’Brien, Kovachevski tha se me të foli për prioritetet e politikës së jashtme të Qeverisë dhe për raportin mes dy shteteve.

“Me Ndihmës Sekretarin amerikan të Shtetit për Europën dhe Euroazinë theksuam rëndësinë e partneritetit të fortë strategjik mes Maqedonisë së Veriut dhe Shteteve të Bashkuara. Biseduam për zhvillimet e brendshme politike në Maqedoninë e Veriut dhe për prioritetet e politikës së jashtme të Qeverisë”, ka shkruar ai në X.

O’Brien gjithashtu do të takohet edhe me kryeministrin e Shqipërisë, Edi Rama, presidentin e Malit të Zi, Jakov Milatoviq.

Më herët, Departamenti Amerikan i Shtetit bëri të ditur se O’Brien do të udhëtojë për në Paris, Francë dhe Bruksel, Belgjikë, nga 9 deri më 14 nëntor 2023.

“Ndërsa në Paris, ai do të marrë pjesë në Forumin e Paqes në Paris dhe do të takohet me drejtorin politik francez Frederic Mondoloni dhe zyrtarë të tjerë francezë për të diskutuar sfidat rajonale dhe globale. Ndihmës Sekretari O’Brien do të takohet gjithashtu me liderët evropianë, duke përfshirë kryeministrin shqiptar Edi Rama, kryeministrin armen Pashinyan, kryeministrin e Kosovës Albin Kurti, presidentin malazez Milatovic dhe kryeministrin e Maqedonisë së Veriut Dimitar Kovachevski për të diskutuar çështjet rajonale dhe dypalëshe”, thekson komunikata e DASH.

James O’Brien u emërua në këtë post më 5 tetor të këtij viti.