6 minuta më parëDështimi i radhës për Qeverinë Kurti: Nuk i siguroi tabletët, s’filloi sot regjistrimi i popullsisë
Periskopi(3 vite më parë)
(3 vite më parë)Ndonëse sot pritej të fillonte procesi i regjistrimit të popullsisë, një gjë e tillë nuk ka ndodhur. Kryeshefi Ekzekutiv i Agjencisë së Statistikave të Kosovës, Ilir Berisha, ka thënë për Radio Kosovën se procesi nuk ka filluar për shkak të mungesës së tabletëve për regjistrim, të cilët do të duhej të siguroheshin nga Qeveria. Regjistrimi […]
Regjistrimi i popullsisë, i cili do të duhej të fillonte në shtator të këtij viti, e më pas u shty nga Qeveria e Kosovës për 1 nëntor, nuk ka filluar as sot, ndonëse nuk ka një vendim për shtyrje të këtij procesi. Mos fillimin e procesit të regjistrimit e ka konfirmuar për Radio Kosovën kryeshefi ekzekutiv i Agjencisë së Statistikave të Kosovës, Ilir Berisha, i cili thotë se regjistrimi do të fillojë sapo të sigurohen tabletët.
“Mbetet në fuqi vendimi për regjistrimin e popullsisë prej 1 nëntorit deri më 15 dhjetor. Ky është vendimi i fundit i Qeverisë. Tabletët ende nuk kanë ardhur. Jemi në pritje që t’i sigurojmë tabletët e më pas ne të dalim e të procedojmë me regjistrimin e popullsisë nëpër komuna”, tha ai.
I pyetur nëse procesi i regjistrimit do të zgjasë për aq ditë sa do të fillojë me vonesë, kryeshefi i ASK, Ilir Berisha, ka thënë se për këtë duhet të pyetet Qeveria e cila merr vendime. Radio Kosova ka pyetur Qeverinë se a i ka siguruar tabletët e nevojshëm për ASK-në, dhe kur pritet të fillojë regjistrimi i popullsisë? Por, nga Zyra e Kryeministrit nuk kanë kthyer përgjigje.
Ndërkohë, se regjistrimi i popullsisë do të fillonte nga sot e kishte konfirmuar edhe kryeministri Albin Kurti, i pyetur në konferencën për media pas mbledhjes së 27 tetorit të Qeverisë.
“Ne kemi nxjerrë vendimin që regjistrimi të fillojë më 1 nëntor dhe tani për tani nuk kemi tjetër vendim”, ka thënë kryeministri.
Nga ASK kohë më parë kanë thënë se përgatitjet për procesin e regjistrimit janë përcjellë me sfida, e ndër to ka qenë edhe numri i vogël i kandidatëve të interesuar për regjistrues. Ky numër do të duhej të ishte rreth 3 mijë e 500, por që nuk është plotësuar.
Regjistrimi i fundit i popullsisë në Kosovë është bërë në vitin 2011. Sipas këtij regjistrimi, numri i përgjithshëm i banorëve në Kosovë ishte 1 milion e 773 mijë e 971 banorë.
Në këtë regjistrim nuk ishin përfshirë banorët e komunave me shumicë serbe në veri të Kosovë, të cilët kishin refuzuar procesin.
