Shërbimi sekret i këtij shteti zbuloi ‘atentatorët’ e Abdixhikut, Hotit, Zemajt e Gashit

Një atentat ndaj kreut të LDK-së, Lumir Abdixhiku, dhe tre deputetëve të tjerë, Armend Zemaj, Avdullah Hoti dhe Arben Gashi ishte planifikuar në Kosovë. Tashmë lajmi u konfirmua edhe nga Policia e Kosovës.

Policia e Kosovës ka thënë se autoritetet veçse kanë ndërmarrë hapat e nevojshëm.

“Policia e Kosovës, në këtë rast drejtoria kompetente e PK-së, ka ndërmarr të gjitha veprimet e nevojshme policore lidhur me rastin/kanosjen në fjalë. Të gjitha veprimet e mëtejme policore do të ndërmerren në bashkëpunim dhe koordinim me organet e drejtësisë”.

Burimet e Gazeta Insajderi tregojnë se kërcënimi ndaj deputetëve të LDK-së u zbulua nga Shërbimi Sekret i Gjermanisë (BND).

BND-ja gjermane ka rënë në gjurmë të atentatorëve të cilët po planifikonin një atentat direkt ndaj kryetarit të LDK-së dhe deputetëve të kësaj partie.

Po ashtu, këto burime thonë se organet e Gjermanisë kanë njoftuar Policinë e Kosovës për këtë rast.

Këtë fakt e ka konfirmuar edhe nënkryetari i LDK-së Kujtim Shala, ndonëse pa ia përmendur emrin publikisht.

“Mund të konfirmojë se ka pasur një lloj planifikimi në Kosovë dhe disa vende të BE-së dhe jashtë territorit të Evropës. Individët kanë rënë pre e përgjimeve të një vendi të BE-së. Nga ajo që na është thënë ka pasur një plan të strukturuar për atentat ndaj Abdixhikut dhe tre deputetëve të LDK’së”, tha ai për rtvdukagjinin.