Gjermania nuk do të pengojë Poloninë të furnizojë Ukrainën me tanket Leopard

Ministrja e Jashtme gjermane, Annalena Baerbock, ka thënë se Gjermania nuk do të “qëndronte në rrugë” që Polonia të dërgojë tanke Leopard në Ukrainë.

Kjo deklaratë duket si sinjali më i qartë i dhënë deri më tani nga Berlini, për aleatët evropianë që të mund të dorëzojnë tanket e prodhimit gjerman në Ukrainë, shkruan BBC.

E pyetur në një intervistë me televizionin francez LCI se çfarë do të ndodhte nëse Polonia do të dërgonte tanket e saj Leopard 2 pa miratimin gjerman, Baerbock u përgjigj përmes një përkthyesi duke thënë se: “Për momentin pyetja nuk është bërë, por nëse do të na bënin ne nuk do të qëndronim në rrugë.”

Kujtojmë se mbi Berlinin është ngritur një presion i madh diplomatik për të dërguar tanket e tij, ose të paktën për të lejuar vendet që i posedojnë ato t’i eksportojnë në Ukrainë, pasi si prodhues i tyre, Berlini ka të drejtën e vetos për transferimin e tyre.

Në një samit të posaçëm ndërkombëtar të mbajtur të premten në bazën ushtarake amerikane në Ramstein, në Gjermaninë jugperëndimore, Berlini me kokëfortësi refuzoi të merrte një vendim nëse do t’i jepte tanke Leopard 2 Ukrainës, duke çuar një zhgënjim në rritje te Kievi dhe aleatët e tij.

Ky qëndrim u kritikua edhe nga kryeministri i Polonisë, Mateusz Morawiecki, i cili e cilësoi si të papranueshëm, përcjell Periskopi.

“Qëndrimi i Gjermanisë është i papranueshëm. Ka kaluar gati një vit që nga fillimi i luftës. Njerëz të pafajshëm po vdesin çdo ditë”,- u shpreh Morawiecki.