Bulliqi në takim me zv.komandantin e KFOR’it: Folëm për sigurinë në Podujevë dhe në vend

Postimi:

Sot kam pritur në takim Zëvendëskomandantin e KFOR-it Gjeneral Brigade Jozsef Szpisjak dhe Shefin e Ekipit Ndërlidhës Monitorues Karoly Kovacs, me të cilët biseduam për situatën e sigurisë në Komunën e Podujevës dhe në nivel vendi.

Gjatë takimit shpreha shqetësimin tim për barrikadat e ngritura në veri të vendit dhe bllokimin e pikë-kalimit kufitar në Merdar, të cilat po e bllokojnë lëvizjen e lirë të qytetarëve dhe po e cenojnë sigurinë e përgjithshme në vend.

Zëvendëskomandanti i KFOR-it gjenerali Szpisjak tha se në kuadër të misionit të KFOR-it, ofrimi i sigurisë për qytetarët e Kosovës, liria e lëvizjes dhe krijimi i një ambienti të qetë e të sigurt për të gjithë janë edhe detyrë mandatore e tyre, të cilët në koordinim me institucionet shtetërore të Kosovës do ta përmbushin misionin e tyre.

Në emër të Komunës së Podujevës e falënderova Zëvendëskomandantin për bashkëpunimin e shkëlqyeshëm që kemi me trupat e KFOR-it në Komunën e Podujevës. Duke qenë edhe komunë kufitare ne kemi takime të rregullta e bashkëpunim të ngushtë në sfera të ndryshme.

U pajtuam që bashkëpunimin e mirë që e kemi ta kultivojmë e thellojmë edhe më tej, në interes të gjithë qytetarëve.