Guardiola në luftë të hapur me tifozët e City: Nuk kërkoj falje, jam gati të tërhiqem nëse nuk më duan

Gjatë konferencës për shtyp në prag të ndeshjes së kampionatit kundër Souothampton, trajneri Pep Gguardiola është kthyer të flasë për polemikat në lidhje me numrin e pakët të tifozëve në stadium kundër Leipzig.

Manchester City zhvilloi ndeshjen hapëse të sezonit në Champions League, por tribunat e stadiumit kishin shumë vende boshe.

Kjo gjë nuk i pëlqeu aspak trajnerit të ‘Citizens’, i cili më pas pati kritika për tifozët. Për këto kritika ai nuk është pishman, madje refuzon në çdo formë që të kërkojë falje.

“Nuk kam ndërmend të kërkoj falje për atë që kam thënë, jam i befasuar nga ajo që ka ndodhur. Nuk është hera e parë në karrierën tim që them një gjë të tilllë, ka ndodhur te Barcelona dhe Bayern Munich”, ka thënë Pep, përcjell Periskopi.

“Që të jenë 10.000 ose 50.000, ne kemi nevojë për mbështetjen e tifozëve tanë. Gjithmonë dhe gjithsesi. Më pas, nëse unë jam një problem për tifozët, jam gati të tërhiqem”, shtoi ai.

Presidenti i tifozëve të Manchester City e ka akuzuar trajnerin spanjoll se nuk e kupton situatën ekonomike të tifozëve, duke e ftuar që të përqendrohej vetëm te drejtimi i skuadrës dhe jo te sjellja e tifozëve.