Nurellari: Ftesa për Bregovicin e pahijshme, por festa është e rëndësisë lokale me qebapa e meze

Ai në një intervistë për Edicionin Special në Klan Kosova u shpreh se është një lloj barre e papërgjegjësisë dhe sjelljes së panevojshme të Bashkisë së Korçës, sepse siç tha, Ballkani ka mjaft artistë.

Faktin që kjo çështje ka zgjuar shumë reagime si në Kosovë ashtu edhe në Shqipëri, Nurellari shprehet se është fenomen i ushqyer pak nga rrjetet sociale dhe se mendon që edhe reagimin e ka bërë përtej nevojës.

“Në fund të fundit bëhet fjalë për një aheng në Korçë dhe jo për ndonjë eveniment të nivelit kombëtar. Pra është festë lokale me qebapa e meze dhe s’meriton të shkaktojë probleme mes shteteve të një kombi”.

“E shikoj si fenomen të panevojshëm të rrjeteve sociale, me deklarata që po keqinterpretohen”.

“Më 2006 Bregoviqit iu dha Çelësi i Artë nga Bashkia e Tiranës, por atëherë s’ka pasur rrjete sociale për të bërë shumë bujë”.

Ndërkaq, sa i përket nismës së Ballkanit Perëndimor, ku nuk bën pjesë Kosova, Nurellari e vlerëson se kemi një ftohje të marrëdhënieve mes dy shteteve, pra Kosovës e Shqipërisë dhe se për këtë faj kanë Rama e Kurti.

“Kjo vjen për arsye të dy kryeministrave kapriçozë e me ego të sëmura, që janë të gatshëm ta dëmtojnë dhe cenojnë interesin kombëtar për hir të inateve personale”.

“Pra kjo do të duhej të ishte në qendër të vëmendjes në Shqipëri e Kosovë, sepse konflikti personal mes dy liderëve shkon në atë nivel sa të cenojë edhe marrëdhëniet mes dy shteteve. Të dy janë problematikë, qoftë Kurti, qoftë Rama, dhe do të duhej që presioni publik të mos ishte për Bregoviqin sepse si çështje është krejt periferike, por të kanalizohej tek qeveritë përkatëse që të ndërtojnë një raport edhe më të ngushtë”, tha ai.