Presidenti brazilian dërgohet në spital, nuk i pushonte lemza prej 10 ditësh

Presidenti brazilian Jair Bolsonaro, 66 vjeçar, mund të ketë nevojë për operacion urgjent pasi kishte lemzë të vazhdueshme për 10 ditë.

Ai po transferohet në një spital në Sao Paulo për t’iu nënshtruar testeve për zorrë të bllokuar.

Në një cicërimë, Bolsonaro tha se ai do të “kthehej së shpejti, me dëshirën e Zotit”.

Ka pasur shqetësime në lidhje me shëndetin e presidentit brazilian që kur ai u godit me thikë në zorrë ndërsa bënte fushatë në vitin 2018. Bolsonaro u plagos rëndë në sulm dhe humbi 40% të gjakut të tij. Ai ka kryer disa operacione që nga ajo kohë.

Presidenti shkoi në spitalin ushtarak në Brasilia herët të mërkurën dhe mjekët thanë atëherë se ai do të ishte nën vëzhgim për 24 deri në 48 orë.

Por më vonë të njëjtën ditë, zyra e presidentit tha që Antonio Luiz Macedo, kirurgu që operoi Bolsonaron në 2018, kishte rekomanduar që presidenti të transferohej në Sao Paulo për analiza shtesë dhe kirurgji të mundshme.

Fabio Faria, menaxheri i komunikimit i Brazilit, u tha gazetarëve se Bolsonaro ishte qetësuar në mëngjes përpara se të dërgohej në Sao Paulo. Djali i presidentit Flavio i tha CNN Brazil se babai i tij kishte kaluar një procedurë për të hequr lëngun nga stomaku i tij si një masë paraprake.

Flavio shtoi se babai i tij kishte pasur probleme në të folur, por që nëse do të duhej një operacion nuk do të ishte një procedurë serioze, shkruan BBC, transmeton Klan Kosova