Gjoshi i PDK-së e quan mashtrues Albin Kurtin: Më përpara shkon në Norvegji, se në Deçan

Betim Gjoshi nga PDK-ja ka pasur kritika ndaj kryeministrit të Kosovës, Albin Kurtit, që ende nuk ka reaguar për helmimin e mbi 900 personave në komunën e Deçanit.

Gjoshi e ka quajtur kryeministrin Kurti, mashtruesin e Kosovës, duke thënë se i njëjti ka humbur e më përpara do të shkonte në Norvegji se sa në Deçan.

“Ka humbur kryeministri i Kosovës, Albin Kurti. Nuk po don të lodhet të shkojë deri në Deçan, ku qindra qytetarë janë helmuar. Ai duhet të shkojë dhe t’i vizitojë. Ta shoh nga afër gjendjen në spitalin e këtij qyteti. Por, jo”, ka shkruar ai.

“Kryemashtruesi që na paraqitej si njeri i afërt me qytetarin e thjeshtë e të varfër, më përpara e merr rrugën për Norvegji se për në Deçan. Kryemashtruesi, prej ditës që ka hipur në xhip të zi, i ka harruar njerëzit e thjeshtë e të varfër që ecin trotuareve”, shtoi Gjoshi.

Për helmimin e qytetarëve nga Deçani ka reaguar presidentja e vendit, Vjosa Osmani.

Ajo ju ka bërë thirrje organeve kompetente që këtë rast ta trajtojnë me urgjencë.

Në anën tjetër, drejtori i Institutit Kombëtar të Shëndetësisë Publike të Kosovës (IKSHPK), Naser Ramadani, nëpërmjet një konference, ka thënë se nuk kanë vërejtur ende nëse më se 900 persona të infektuar në Deçan kanë kërkuar ndihmë mjekësore për shkak të ujit të kontaminuar.

Ramadani, në konferencën e thirrur nga Ministria e Shëndetësisë, deklaroi se në bashkëpunim me ministrinë nga mostrat e marra kanë nxjerrë rezultatet e dyta laboratorike, të cilat nuk konstatojnë se uji që vinte nga ujësjellësi rajonal i Deçanit nuk është i kontaminuar./GazetaExpress/