Boiken Abazi: Rama e përqafi Albinin si boksier, pas përqafimit i mëshoi grusht

Abazi e ka cilësuar përqafimin në fjalë të llojit “prej boksieri” dhe jo “vëllazërot” duke pretenduar madje se Rama e ka grushtuar Kurtin në një televizion pas atij përqafimi.

“Rama i dha, megjithatë, një përqafim prej atyre që boksieri bënë për të marrë pak frymë e për t’u shplodhur, para grushtit të radhës.” – ka shkruar z. Abazi në profilin e tij në Facebook, përcjell Periskopi.

Ai pretendon se më pas Rama e goditi me grusht “nismën e Kurtit” për ta paditur Serbinë për gjenocid në Kosovë.

Në fakt, kryeministri Kurti duket i buzëqeshur në përqafimin me kryeministrin Edi Rama.

Statusi i plotë:

Përqafimi që Rama i bëri Kurtit nuk ishte i llojit vëllazëror. Ai ishte përqafim prej boksieri, edhe pse Kurti nuk kishte ardhur aspak për ndeshje me Ramën, por për koordinim kombëtar. Rama i dha, megjithatë, një përqafim prej atyre që boksieri bënë për të marrë pak frymë e për t’u shplodhur, para grushtit të radhës. Dhe grushti erdhi menjëherë pas “përqafimit”, në intervistën për “Euronews Serbia”, ku Rama e goditi nismën e qeverisë Kurti për ta paditur Serbinë për gjenocid në Kosovë.