Ronaldinho i shfrenuar pas vdekjes së nënës: Aheng çdo natë dhe alkool i tepruar

Ajo ka qenë një nga personat që e ka ndihmuar më së shumti fituesin e një Topi të Artë dhe largimi i saj nga jeta ishte një nga goditjet më të mëdha për ish-yllin e Barcelonës dhe Milanit.

Braziliani gjithmonë ka qenë një person i lidhur me alkoolin dhe jetën e natës, por raportimet e fundit zbulojnë se ai po e vuan tepër humbjen e nënës dhe ka nisur të pijë më shumë se më parë dhe të frekuentojë vazhdimisht lokalet e natës.

Një person i afërt me të, i paidentifikuar nga mediet braziliane zbulon gjithçka: “Dinho shkon çdo ditë në party. Nis të pijë vodka, uiski apo xhin deri në mëngjes. Largohet dhe rikthehet sërish ditën tjetër për të bërë të njëjtën gjë.

Atij gjithmonë i ka pëlqyer ta bëjë këtë, por u bë shumë më e shpeshtë pas vdekjes së nënës së tij. Jeton në një ‘fortesë’ (në Porto Alegre, Brazil) me gjithçka që i nevojitet. Ka një zemër bujare dhe përpiqet të jetë bujar me miqtë e tij. Por jo të gjithë janë të vërtetë dhe ata nuk e shohin se ai po i bën dëm vetes së tij”, tregoi ai.