A iu thashë? Hoti pas letrës që Blinken i drejtoi Vuçiqit: Këta janë miqtë e vërtetë

Hoti deklaroi se në Qeverinë e kaluar të drejtuar prej tij u ri-fillua dialogu me parime të qarta.

Ai ka nënkuptuar se kjo letër drejtuar z. Vuçiq nga Sekretari Blinken e ku kërkohet sërish “njohja reciproke” ka ardhur si rezultat i punës së tij në qeverisje.

Hoti kishte nënshkruar Marrëveshjen e 4 shtatorit në Washington, e prej të cilës Kosova përfitoi njohjen nga Izraeli dhe një duzinë investimesh serioze amerikane por edhe izraelite, shkruan Periskopi.

Nuk dihet nëse z. Hoti do të respektojë vendimin e LDK-së për të marrë pjesë në votimin për presidente të Kosovës.

Statusi i plotë:

Në linjë me deklarimin e Presidentit Biden, Sekretari i Shtetit Blinken i kërkon prapë Serbisë të përmbyllë marrëveshjen me Kosovën me njohje reciproke.

Këta janë miqtë e vërtetë të Kosovës. Duhet ta ruajmë miqësinë speciale me SHBA-të. Presidenti Rugova, një burrështetas vizionar e ka thënë këtë para 30 vitesh.

Dialogu është ri-filluar mbi parime të qarta në Qeverinë e kaluar – dialog vetëm për marrëveshje përfundimtare për njohje reciproke, pa u cenuar karakteri unitar i shtetit të Kosovës dhe integriteti territorial i Republikës së Kosovës.

Mbi këto parime kemi fituar mbështetjen e partnerëve tanë për këtë proces.