Avokatët e krerëve të UÇK-së i drejtohen gjykatës me një kërkesë të përbashkët

Avokatët e Hashim Thaçit, Kadri Veselit, Rexhep Selimit dhe Jakup Krasniqit, kanë bërë një kërkesë të përbashkët për shtyrjen e afatit të dorëzimit të parashtresave për lirim nga paraburgimi.

Gjyqtari i procedurës paraprake, në konferencën e mbajtur më 16 shkurt 2021, ka urdhëruar mbrojtjen që të “dorëzojnë deri të premten, më 26 shkurt, parashtresat nëse arsyet për vazhdimin paraburgimit ekzistojnë ende”, shkruan në dokumentin e publikuar nga Dhomat e Specializuara, përcjell Periskopi.

“Në përputhje me Rregullin 9(5)(a) të Rregullave të Procedurës dhe Provave, avokati i Hashim Thaçit, avokati i Kadri Veselit, avokati i Rexhep Selimit dhe avokati i Jakup Krasniqit (së bashku, “mbrojtja”), kërkojnë variacion të kësaj kohe në mënyrë që parashtresat e kërkuara të sigurohen, nëse është e nevojshme, brenda dhjetë (10) ditësh pas marrjes së vendimit nga Paneli i Gjykatës së Apelit për kërkesat që janë në pritje rreth refuzimit të lirimit të përkohshëm për secilin të akuzuar”, thuhet në dokument.

Sipas mbrojtjes, së pari duhet të pritet vendimi i apelit për lirimin e përkohshëm të akuzuarve.

Në fund, mbrojtja ka kërkuar nga gjyqtari i procedurës paraprake që:

1. Të gjejë një arsye të mirë në përputhje me Rregullin 9(5)(a) të Rregullave për variacion të limitit kohor, dhe

2. Të urdhërojë, për secilin të akuzuar, parashtresat në lidhje me ekzistimin e arsyeve për vazhdimin e paraburgimit, nëse është e nevojshme, brenda 10 ditësh nga pranimi i vendimit relevant të Apelit