Trajneri i Greqisë: I njoh lojtarët e Kosovës, përmend Rashicën e Zenelin

Pas barazimit 1-1 në ndeshjen e parë në udhëtim te Moldavia, Kosova nesër (6 shtator) do takohet me Greqinë në kuadër të Ligës së Kombeve.

Të dy skuadrat do hyjnë në këtë ndeshje pas barazimeve, me Greqinë që gjithashtu regjistroi barazim ndaj Sllovenisë në ndeshjen e parë (0-0).

Selektori i grekëve, John van’t Schip, është paraqitur sot në konferencë për media, duke u shprehur:

“Kosova ka një ekip të mirë të organizuar. Unë i njoh shumicën e lojtarëve, personalisht i njoh dy lojtarë që kanë luajtur në Holandë, Rashicën dhe Zenelin. Ne e kemi parë Kosovën, por ka qenë periudhë e çuditshme për të gjithë ne, sepse na është dashtë t’i shikojmë ndeshjet që janë luajtur para 10 muajve” – tha Schip.

Tutje, 56 vjeçari nga Kanada tha se ata do luajnë lojën e vetë dhe se lojtarët duhet të kenë besim në vetvete dhe kështu nuk do mungojnë rezultatet.

“Duhet të vazhdojmë të luajmë si duhet në mënyrë që të kenë lojtarët besim në vetvete dhe natyrisht që do të vijnë rezultatet. Ne do ta shohim pas stërvitjes së sotme, pasi kemi luajtur para dy ditëve. Sot do të vendosi se me cilët lojtarë do të luajë nesër” – deklaroj Schip.

Ndryshe, ndeshja mes Kosovës dhe Greqisë zhvillohet nesër me fillim prej orës 20:45 në stadiumin ‘Fadil Vokrri’.