Kosovë-Angli: ‘Dardanët’ përfundojnë stërvitjen e fundit para ndeshjes

Edhe djelmoshat e Kosovës U21 e kanë zhvilluar sot seancën e fundit stërvitore para ndeshjes me Anglinë U21.

Kombëtarja U21 do ta zhvillojë nesër ndeshjen kundër Anglisë U21 në kuadër të kualifikimeve për Evropianin 2021.

Përzgjedhësi Rafet Prekazi për këtë ndeshje ka grumbulluar edhe dy futbollistë nga lista paraprake, portierin Ardit Nika dhe mesfushorin Qëndrim Zyba – të cilët i pati në stërvitjen e fundit.

Gëzon fakti se të gjithë futbollistët dhe stafi i Kombëtares U21 kanë rezultuar negativ në testin e kryer për Covid-19 nga laboratori i licencuar i UEFA-s orë më parë dhe tani janë plotësisht të fokusuar për t’u paraqitur sa më mirë kundër anglezëve.

Atmosfera në kampin e Dardanëve të rinj është shumë e mirë, derisa edhe entuziazmi dhe dëshira për t’i treguar vlerat e tyre përballë një kombëtareje të madhe si Anglia është e lart.