Challandes optimist për fitoren e “Dardanëve”

Trajneri i kombëtares së Kosovës, Bernard Challandes është deklaruar për ndeshjen ndaj Moldavisë.

Challandes është deklaruar optimist për fitore dhe ka thënë se “Dardanët” këtë e kanë synimin e tyre të vetëm.

Në një konferencë të mbajtur përmes ‘Zoom’, Challandes ka deklaruar se ndaj Moldavisë kërkon që ekipi i Kosovës të luajë mirë dhe të fitojë.

“Ndaj Moldavisë luajmë për fitore, luajmë ndeshje garuese, dhe në ndeshje garuese luajmë gjithmonë për fitore”, ka deklaruar Challandes..

“Është test i mirë për ne, është e rëndësishme të luajmë mirë dhe të fitojmë”.

Ekipi kombëtar i Kosovës, shkaku i situatës me COVID-19, ka mbajtur vetëm dy stërvitje, ndërsa lojtarët që i janë bashkuar ekipit në Itali, do të jenë vetëm një stërvitje.

“Është e qartë se para një ndeshje ndërkombëtare nuk mjafton një stërvitje. Nuk është mënyra më e mirë, por nuk mund ta ndryshojë situatën, duhet të bëjmë më të mirën në këtë situatë”.

“Ka dallime në formën e lojtarëve, disa prej tyre janë në faza të ndryshme të përgatitjeve, po përshtatim përgatitjet për secilin prej tyre, për të marrë më të mirën”.

Kujtojmë që ndeshja Moldavi – Kosovë, luhet në Itali nesër me fillim në ora 20:45.