Koci: Duhet të krijohet një Gjykatë Speciale për krimet e Serbisë në Kosovë

Avokati i njohur Arianit Koci flet se pse duhet të krijohet një Gjykatë Speciale për krimet serbe në Kosovë.

Ai shkruan:

Krimet e shtetit serb

Krimineli i luftës Ratko Mladić, dje në Hagë, ka prezantuar para gjykatës ku është shqyrtuar ankesa e tij.

Përndryshe, Mladić është i dënuar me burgim të përjetshëm.

Komandanti i Ushtrisë Serbe në Republikën Serbe (1992 – 1995), është përgjegjës për për katër ndërmarrje të përbashkëta kriminale.

Në kuadër të tyre për:

-Gjenocidin e kryer në Srebernicë ndaj 8000 meshkujve;

-Terrorizmin e qytetarëve të Sarajevës, gjatë bllokimit të këtij qyteti;

-Dëbimin dhe kryerjen e krimeve ndaj Boshnjakëve dhe Kroatëve të Bosnjës;

– Planifikimin e kidnapimit të ushtarëve të Kombëve të Bashkuara, të cilet është dashur të shërbejnë si mburojë dhe sigurim që NATO nuk do t’i sulmoj caqet serbe në Bosnje.

Gjykata e shkallës së parë e Tribunalit të Hagës në vitin 2017, Mladićin e ka dënuar përveç për gjenocid në Srebernicë, edhe për krime kundër njerëzimit në 15 komuna të Bosnjës dhe Hercegovinës.

Partneri i tij në krim, Radovan Karadžić është dënuar poashtu me burgim të përjetshëm, ndërsa kolegu tjetër i tij, Slobodan Milošević ka vdekur në qendrën e paraburgimit në Hagë në vitin 2006.

Sidoqoftë, për krime në Kosovë – gjenocid dhe krime kundër njerëzimit, nuk ka as për së afërmi serb të dënuar.

Prandaj, duhet të krijohet një Gjykatë Speciale për krimet e shtetit serb në Kosovë.