Munishi: Do të mundohemi në Suharekë t’ia prishim pak festën Dritës

Gjilani dhe Ballkani kanë ndarë pikët në kryendeshjen e xhiros së parafundit të Superligës së Kosovës.

Gjilanasit dhe therandasit barazuan me shifrat 2:2, rezultat ky që e bëri Dritën kampione të re të ligës së Kosovës.

Trajneri i Ballkanit, Ismet Munishi, ka thënë se skuadra e tij ka qenë bukuria e këtij sezoni në Superligë.

“Ndeshja ishte shumë e mirë, Gjilani ka skuadër kualitative. Është një klub i organizuar shumë mirë. Ne bëmë një shfaqje të bukur sot. Falënderoj kryetarin dhe kryesinë e Gjilanit për mikpritjen, e po ashtu edhe gjyqtarët”, deklaroi Munishi për “Super Sport Kosova”.

“Ne dhe Gjilani kemi luajtur gjatë gjithë kampionatit futboll. Mendoj që ishim bukuria e këtij sezoni, Ballkani luajti futbollin më të bukur në Kosovë dhe do të vazhdojmë me punë e angazhim. Problemet tona do t’i zgjidhim me kualitet”, shtoi ai.

“Ndeshja me Dritën? Kemi lojtarë të dëmtuar, Besnik Krasniqin e Visar Berishën, ndoshta me ta në fushë s’do ta merrnim golin e barazimit, por jam i kënaqur me paraqitjen e gjithë lojtarëve. Do të mundohemi në Suharekë t’ia prishim pak festën Dritës”, u shpreh Munishi.