E kërkonte Bayerni dhe Barcelona, talenti shqiptar prezantohet zyrtarisht tek ekipi i ri

E kërkuan shumë klube prestigjioze si Barcelona, Bajern, por talenti shqiptar Fisnik Asllani i ka befasuar të gjithë, duke zgjedhur skuadrën e Bundesligës Hofenhajm. 18-vjeçari do të jetë pjesë e klubi bardheblu deri në verën e vitit 2024.

“Sot është një prej ditëve më të mira në karrierë si futbollist. Kam nënshkruar kontratë katër vjeçare me një klub të madh si Hofenhejm. I falënderoj të gjithë. Shpresoj që të kemi sa më shumë suksese dhe ta ndihmoj ekipin në Ligën e Evropës. E falënderoj edhe Union Berlinin për atë që ka bërë për mua”, ka thënë Asllani për median kosovare KOHA.net.

Shqiptari ishte duke kaluar një formë të jashtëzakonshme në Bundesligën e të rinjve, çka zgjoi dhe interesin e shumë klubeve.

Sidoqoftë, ai e zgjodhi ekipin e miliarderit Dietmar Hop, për shkak edhe të ofertës katër vjeçare profesionale.

“Besoj se te Hoffenheimi do të kem hapësira dhe të jap më të mirën. Tifozët dëshiroj që t’i gëzoj me shumë gola të shënuar dhe të festojmë se bashku në suksese. Shpresoj të kem fat e të mos i zhgënjej”, shtoi ai në deklaratën e tij.

Në Bundesligën e të rinjve u19, me skuadrën e Union Berlinit, talenti kosovar ka shënuar 15 gola e 7 asistime në 16 ndeshje.

Qendërsulmuesi shtatlartë ka luajtur edhe për Kosovën edhe për Gjermaninë. Me grupmoshën U17 të Kosovës, ai ka debutuar më 9 shtator 2018 dhe ka shënuar 1 gol në 5 takime. Me Gjermaninë u18 ka debutuar më 10 dhjetor të vitit të kaluar dhe ka një gol në dy ndeshje.