Racizmi dhe homofobia në futboll, flet Presidenti i La Ligas

Presidenti i La Liga-s, Javier Tebas, analizoi për “Rac-1” ditët e para, pas rikthimit të futbollit në Spanjë. Si zakonisht, nuk ishte e nevojshme të mundohesh shumë për të evidentuar tituj “bombastikë”. Këto janë deklaratat e tij kryesore.

Racizmi dhe homofobia në futboll – “Tashmë jemi pozicionuar kundër çështjes së racizmit. Unë besoj se ky problem ndodhet sot në SHBA. Kur kemi pasur probleme racizmi, ne i kemi sulmuar hapur ato. Jemi Liga e vetme në botë, që ka bërë një ankesë penale kundër sulmit ndaj Williams në “Cornellà”. Kjo është ajo që duhet të bëhet për të sulmuar racizmin. Jo më pak se 15 herë kemi bërë denoncime për koret raciste apo homofobike. Pra, jemi këtu për të marrë vendime të vështira ndaj këtij fenomeni.

Lidhur me atë, nëse do të ishte mirë nëse futbollistët mund të flisnin lirshëm për homoseksualitetin e tyre, unë kam qëndrimin tim. Nëse me të vërtetë kemi homoseksualë mes futbollistëve tanë, do të ishte mirë ta bashkëzgjedhin personalitetin e tyre. Do të më dukej perfekte nëse disa lojtarë e bëjnë këtë, të mos e mbajnë të fshehtë prirjen e tyre seksuale. Pse jo, do të ishte mirë edhe për shoqërinë. Nuk më pëlqen fakti se ata duan ta fshehin këtë”.

Reduktimi i ekipeve në La Liga – “Jo, është një model konkurence që, sipas mendimit tonë, nuk funksionon. Nuk po mendojmë ta zvogëlojmë numrin e ekipeve në një afat të shkurtër ose të mesëm. Modeli është i vendosur me 20 klube dhe ka arsyen e tij për të qenë kështu. Problemi qëndron me kalendarët, sepse duhet llogaritur edhe Liga e Kampionëve, ndeshjet luhen në fundjavë, shpiken gara siç është Liga e Kombeve, rritet numri i skuadrave në një Kupë Bote… Është e rëndësishme të theksohet se vetëm në një sezon, ligat më të mëdha në Europë gjenerojnë më shumë para se pesë Kupa Bote, pesë herë më shumë sesa një Champions. Le të mos i ndryshojmë ato që funksionojnë dhe kanë krijuar një industri kolosale. Industria e futbollit në Europë është më e rëndësishme se NBA dhe NFL”.

Kriza e futbollit pas pandemisë – “Ne me siguri do të shohim më shumë shkëmbime lojtarësh mes klubeve tani. Natyrisht, do të ketë edhe qarkullim parash, por jo më në shifra të mëdha. Situata është ajo që është. Ligat kryesore në Europë kanë pësuar kriza të mëdha. Nuk do të ketë lëvizje të mëdha parash, nëse klubet shtetërore nuk e gjallërojnë tregun, por jo me para nga sektori i gazit apo naftës. Nëse verën e kaluar qarkulluan 3 miliardë e 500 milionë euro në mesin e ligave të mëdha, unë nuk mendoj se do të shkojmë përtej 800 milionëve këtë vit”.