Portieri i Kosovës refuzohet nga gjiganti turk

Largimi i Loris Karius pas mbylljes së bashkëpunimit me portierin në pronësi të Liverpulit, ka bërë që Beshiktashi të fillojë kërkimin për pasardhësin e tij në sezonin e ardhshëm. Të shumtë kanë qenë emrat e portierëve që i janë ofruar klubit e mes tyre në muajt e kaluar është përmendur edhe ai i Gentian Selmanit.

Megjithatë, mediat në Turqi shpjegojnë se më së fundmi, në klub është diskutuar emri i një tjetër portieri shqiptar, ai i Samir Ujkanit, Gardiani i përfaqësueses së Kosovës aktualisht është portier i dytë te Torino por do të dëshironte një skuadër ku mund të luante rregullisht e të rifitonte vendin mes shtyllave edhe në ekipin kombëtar.

Një menaxher ia sugjeroi Ujkanin klubit duke kujtuar se ai ka edhe eksperiencë në kampionatin turk ku ka luajtur me Rizespor. Transferimi me parametër zero në verë do të ishte një mundësi e mirë për Beshiktashin që nuk po kalon një periudhë të lumtur financiarisht. Por kur emri i Ujkanit ka përfunduar në tavolinën e trajnerit Sergen Jalçin, ky i fundit nuk ka qenë i entuziazmuar me këtë variant që i është shfaqur për skuadrën e tij. Tekniku kishte bërë të ditur se kërkonte një lojtar i cili të kishte luajtur rregullisht dhe Ujkani këtë vit në Itali nuk ka zbritur në fushën e lojës, ndaj nuk shihet si një opsion që plotëson kushtin për të qenë protagonist te Beshiktashi. /vipsport.al/