AAK kapet me Natyra Kuqin pasi tha se koalicioni me ta ishte gabim

Zëdhënësja e AAK-së, Diana Rugova ka thënë për Insajderin, se marrëveshja për koalicion parazgjedhor është arritur në pajtim dhe vullnet të dy partive politike dhe se PSD nuk është ndëshkuar nga elektorati shkaku i tyre.

“Marrëveshja për koalicion parazgjedhor në mes të AAK-së dhe PSD-së për Zgjedhjet për Kuvend të Republikës së Kosovës 2019, është arritur me pajtim dhe vullnet të dy partive politike. PSD nuk është ndëshkuar për shkak të koalicionit me AAK”, ka thënë Rugova për Insajderin.

Ndërsa, duke komentuar deklaratën e Kuçit, që nuk janë votuar në zgjedhje, Rugova ka thënë se PSD-ja nuk ka arritur ta mobilizonte elektoratin e saj.

“Pas shkëputjes nga VV, është evidente se PSD nuk kishte arritur ta strukturonte bazën e vet politike në terren dhe ta mobilizonte elektoratin e saj”, ka deklaruar Rugova.

Natyra Kuçi sot gjatë ditës ka deklaruar se njëra ndër arsyet që kjo parti u “ndëshkua” duke mos u votuar në zgjedhjet e kaluara, ishte edhe koalicioni me AAK-në.

“Ishte gabim koalicioni që bëmë me AAK-në, pasi nuk përputhej me atë çka thirremi ne”, është shprehur Kuçi në Klan Kosova.

Kuçi ka thënë që ky koalicion ndodhi pasi PSD-ja ishte në fillimet e saj dhe nuk kishte struktura të forta.

“Elektorati jonë nuk e pranoi një vendim të tillë. U bënë disa arsye që nuk u votuam në zgjedhje”, ka pohuar ajo.

Marrëveshja për koalicion parazgjedhor në mes AAK-së dhe PSD-së, ishte arritur më 19 gusht të vitit të kaluar.