Zyrtare: S’ka futboll më as në Turqi

Turqia ishte ndër vendet e vetme të Evropës që ende nuk e kishte pezulluar futbollin dhe ndeshjet e tjera, pas përhapjes me të madhe të pandemisë së koronavirusit në gjithë Kontinentin e Vjetër.

Në këtë zhagitje sigurisht ka luajtur rol të madh edhe numri i vogël i të infektuarëve në Turqi, por tash edhe atje s’do të ketë më futboll, transmeton Periskopi.

Lajmin për pezullimin e të gjitha sporteve e ka konfirmuar Ministria e Sportit, pas një takimi me Federatat.

“Kemi vendosur të pezullojmë ligat pas takimit me federatën e futbollit, volejbollit e basketbollit dhe krerët e klubeve. Shëndeti i sportistëve tanë është shumë i rëndësishëm. Ne duhet të marrim masat e nevojshme”, ka thënë ministri Mehmet Kasapoglu. /Periskopi.com/