Futbollisti shqiptar që përfaqëson Maqedoninë e Veriut flet për ndeshjen me Kosovën dhe panikun nga koronavirusi

Enis Bardhi, lojtari me origjinë shqiptare që përfaqëson Maqedoninë e Veriut, ka deklaruar në një intervistë për “Fan Zone” se ai nuk ka frikë nga këto ditë izolimi, sepse është mësuar të jetojë i vetëm që 16 vjeç.

24 vjeçari që luan me Levanten në Spanjë foli gjithashtu për ndeshjen Kosovë-Maqedoni, në kuadër të Ligës së Kombeve, duke u shprehur se më mirë që u shty sesa të luhej pa tifozë.

Mesfushori Bardhi foli edhe për mënyrën sesi po kalon ditën, e cila është e fokuasuar te programi stërvitjes dërguar nga klubi, ndërsa thekson se shëndeti është gjëja më e rëndësishme në këto momente.

Si është situata në Spanjë?

Ashtu si në gjithë Europën, ne jemi mbyllur brenda dhe njerëzit janë ndërgjegjësuar shumë për të qëndruar në izolim. Ka shumë pak lëvizje dhe shpresoj që të kalojë sa më shpejt, pasi shëndeti i njerëzve është më i rëndësishëm.

Si po përgatitesh gjatë këtyre ditëve?

Kemi marrë programe specifike nga trajnerët dhe stafi i përgatitësve atletikë, të cilat po mundohem t’i zbatoj me përpikëri në kushtet e shtëpisë, për të ruajtur trupin në formë.

A e keni menduar të largoheni nga Spanja gjatë këtyre ditëve?

Në fakt unë jam mësuar të qëndroj vetëm, pasi jam larguar nga familja që në moshën 16-vjeçare. Gjatë kësaj kohe kam qenë në kontakt të vazhdueshëm me familjen time dhe u kam qëndruar strikt ushtrimeve që na kanë ngarkuar nga klubi, ndaj nuk e kam menduar të thyej rregullat e izolimit e të largohem.

Pa koronavirusin do të luhej edhe ndeshja mes Maqedonisë së Veriut dhe Kosovës, ku priteshin shumë tifozë shqiptarë në stadium…

Më vjen mirë që u shty, pasi nuk do të ishte normale që të luhej pa praninë e tifozëve, siç po flitej ditët e fundit. Shpresoj që të luhet në një periudhë të qetë dhe të shijojmë një ndeshe të bukur në fushën e lojës.