Brnabic shpreh publikisht frustrimin me Jovicin – iku nga karantina për të festuar ditëlindje në Beograd

Sulmuesi i Real Madridit, Luka Jovic është kritikuar shumë nga Kyeministri serb pasi theu rregullën e karantinës.

Sulmuesi i “Los Blancos” duhej të ishte në vetëizolim në kryeqytetin spanjoll në kohën e krizës shëndetësore, por vendosi të bënte një udhëtim drejt Beogradit për t’u dëfryer në një aheng për ditëlindjen e të dashurës së tij, transmeton Periskopi.

Futbollistëve serbë që luajnë jashtë u është kërkuar që të mos rikthehen në vendlindje, pasi ka shqetësime se mund ta sjellin pandeminë me vete.

Kryeministrja serbe, Ana Brnabic ka kritikuar Jovicin për neglizhencën, duke thënë se ata që i thyejnë rregullat e shtetit për vetëizolim do të ndiqen penalisht.

“Ne kemi shembuj negativ të futbollistëve tanë, të cilët paguhen shumë mirë, duke injoruar këshillat e vetëizolimit,” ka thënë Brnabic.

“Ne kemi shkruar raporte kriminale kundër disa prej këtyre atletëve të famshëm që janë rikthyer. Këta njerëz do t’i përgjigjen gjykatës kur të vijë koha.”

Jovic gjithashtu pritet të ndëshkohet edhe nga Real Madridi. I gjithë klubi është vënë në karantinë, pasi basketbollisti Trey Thompkins u konfirmua si i prekur me virusin. /Periskopi.com/