3 minuta më parëPolicia interviston për 4 orë nxënësin që dyshohet se xhiroi mësuesin tek e rrihte një nxënës
Periskopi(6 vite më parë)
(6 vite më parë)Policia e Kosovës në Drenas ka zgjedhur që natën ta intervistojë për rreth katër orë një 13-vjeçar, nxënës i klasës së tetë i shkollës fillore “Rasim Kiçina” në Drenas, nën dyshimin se e kishte xhiruar me telefon arsimtarin Driton Çelaj tek e rrihte një nxënës të kësaj klase. Intervistimi është bërë në orët e darkës, […]
Arsimtari i Edukatës Qytetare, të cilin kryetari i Drenasit, Ramiz Lladrovci, një muaj më parë e ka prezantuar si prurje në Partinë Demokratike – shihet në xhirim teksa godet me shpulla një nxënës. Derisa nxënësi ishte ulur, ai i bërtet të kthehet para. Së paku dy goditje të forta në fytyrë shihen dhe dëgjohen tek i jepen nxënësit.
Informata se sonte është intervistuar nxënësi që dyshohet ta ketë bërë xhirimin, është konfirmuar për Koha.net nga familjarë të këtij të mituri. Ata kanë shprehur brengën për presionin, nën të cilin ka qenë nxënësi për ta pranuar se ka xhiruar.
“Djali na është terrorizuar. Nga tash kemi frikë edhe për jetën e tij. Ne besojmë se me urdhër të kryetarit Lladrovci është bërë kjo, sepse xhirimi ka dëshmuar se çfarë njerëzish promovon ai në parti. Vetëm pak kohë më parë, nënën e nxënësit që ishte inspektore, kryetari e ka larguar nga puna”, ka thënë një familjar, që ka pranuar të flasë në kushte anonimiteti.
“Ne druajmë se djalin do ta largojnë edhe nga shkolla. Sot i kanë kontrolluar të gjithë se a kanë telefona me vete, dhe drejtori ka kërcënuar se do ta largojë këdo që e ka bërë xhirimin. Ajo që kanë treguar nxënësit është se xhirimi është bërë vetëm pasi mësuesi pothuajse në çdo orë i rrihte nxënësit”, ka shtuar familjari.
Ndaj mësimdhënësit Çelaj, Komuna e Drenasit ka aplikuar masën e largimit të përkohshëm nga puna. Vendimi është i përkohshëm dhe do të vlejë deri në përfundimin e procedurave nga Komisioni Disiplinor.
