3 minuta më parëKurti më pak ambicioz se Haradinaj e Mustafa sa i përket rritjes ekonomike: Gjërat që duhet t’i dimë
Periskopi(6 vite më parë)
(6 vite më parë)Kryeministri i ri i Kosovës del se nuk është aspak ambicioz sa i përket rritjes së buxhetit të Kosovës. Pritja e tij për rritje në mandatin katër-vjeçar del se nuk dallon prej kryeministrave të tjerë, ndërkohë që rishpërndarja buxhetore është procesi më i komplikuar me të cilin i duhet të merret. Buxheti për vitin […]
Buxheti për vitin 2008 ishte veç 816 milionë euro ndërkohë që buxheti për vitin 2019 ishte rreth 2 miliardë e 300 milionë euro. Nga këto shifra del se buxheti i Kosovës është trefishuar për njëmbëdhjetë vitet e fundit, pavarësisht shpenzimeve të rritura publike, abuzimeve të ndryshme me ndarjen e tij, shpenzimeve të luksit, skemave sociale në rritje, dhe projekteve miliardëshe kapitale.
Kryeministri i ri i Kosovës, Albin Kurti premtoi se pas katër vitesh buxheti i Kosovës do të ishte 3 miliardë euro, shkruan Periskopi.
Marrë parasysh trendin e rritjes së buxhetit në Kosovë, një gjë e tillë pritet të jetë lehtë e realizueshme. Madje, edhe sikur kryeministër i Kosovës të ishte, ta zëmë me gjithë respektin, Labinot Tahiri.
Në seancën e thirrur nga Kurti për t’u votuar si kryeministër, as deputetët e PDK-së nuk e kontestuan një gjë të tillë. Ishte Bedri Hamza ai që shtroi pikëpyetje nëse planet ekonomike të z.Kurti mund të realizoheshin me vetëm 3 miliardë euro.
Por, ai bëri një gabim që nuk u vërejt madje as nga Vetëvendosje. Në fakt, Kurti do t’i ketë në dispozicion mbi 10 miliardë për katër vitet e ardhshme nëse rritja e buxhetit të shtetit vazhdon me ritmet e qeverisjeve të kaluara.
Sidoqoftë, a duhej të prisnim më shumë nga kryeministri i ri i Kosovës?
“Ndryshimi” si koncept duket se nuk do të jetë i vendosur në zhvillimin ekonomik dhe rritjen ekonomike të vendit. Buxheti i shtetit – edhe sipas vetë fjalëve të Kurtit – do të rritet njësoj si më herët.
Por, premtimet për rritje të buxhetit të shtetit kishin dhënë edhe kryeministrat e mëhershëm, Isa Mustafa e Ramush Haradinaj. Të dy e kishin realizuar premtimin e tyre, sepse nuk varej krejtësisht prej tyre.
Në fakt, pika më kryesore e planit ekonomik të Kurtit do të duhej të ishte rishpërndarja e buxhetit dhe jo rritja e buxhetit.
Me afatin e fundit për miratimin e buxhetit që po afron, planet e Kurtit për rishpërndarje mund të marrin shumë kohë.
Ai ka tingëlluar joserioz në shumë prej pikave gjatë fushatës parazgjedhore, si në ndërrimin e përjavshëm të shpërndarjes së milionave dhe në mos-identifikimin e planeve strategjike zhvillimore.
Kujtojmë se në vitin e fundit Kosova kishte rritje ekonomike prej 4,5 për qind, e që ishte rritja ekonomike e gjashta më e shpejtë në Evropë./Periskopi
