Burgun e ka të sigurtë – çka i mbetet tash Agim Ademit?

Presidenti i Federatës së Kosovës së Futbollit, Agim Ademi është dënuar edhe nga Gjykata e Apelit me nëntë muaj burg efektiv.

Numri 1 i FFK-së ishte dënuar nga Gjykata e shkallës së parë me nëntë muaj burg efektiv, vendim të cilin Ademi e kundërshtoi në Gjykatën e Apelit, transmeton Periskopi.

Kujtojmë se burgim efektiv është dënuar edhe i akuzuari tjetër, Muharrem Rama, transmeton Periskopi.

Gjykata e Apelit ka njoftuar se i ka refuzuar si të pabazuara ankesat e Prokurorisë Themelore në Prishtinë dhe avokatëve mbrojtës.“A.A. dhe M.R. janë shpallur fajtor nga ana e gjykatës së shkallës së parë, për veprën penale të detyrimit në tentativë, nga neni 267 paragrafi 2, lidhur më paragrafin 1, lidhur me nenin 20 dhe 23 të Kodit Penal të Kosovës(KPK), dhe janë gjykuar, i pari më dënim më burgim në kohëzgjatje prej 9(nëntë) muajve, ndërsa i dyti më dënim më burgim në kohëzgjatje prej 1(një) viti. Gjykata e Apelit gjeti se aktgjykimi i ankimuar, nuk është i përfshirë në shkelje esenciale të dispozitave të procedurës penale, nuk është shkelur ligji penal dhe se gjendja faktike, është vërtetuar në mënyrë të drejtë dhe të plotë. Apelit vlerësoj se dënimi i shqiptuar është në proporcion më shkallën e rrezikshmërisë shoqërore të veprës penale, shkallën e përgjegjësisë se akuzuarve dhe në funksion të qëllimit të përcaktuar me ligj”, thuhet në njoftimin e Apelit.

Agim Ademi dhe Muharrem Rama akuzohen se gjatë periudhës kohore 12 korrik – 12 shtator 2012, me qëllim të përfitimit material e kishin kërcënuar dhe sulmuar Dritëro Kadollin, duke e detyruar të njëjtin të bëjë veprime në dëm të pasurisë së tij, respektivisht të bëjnë përfitim të pa drejtë në shumën prej 30.000.00 euro, apo një veturë të tipit “BMË X5”, e cila veturë më pas pretendohej t’i dorëzohej Kryesuesit të Asamblesë Komunale të Prishtinës, Sami Hamiti, duke kryer veprën penale detyrimi në bashkëkryerje.

Lidhur me këtë akuzë, Gjykata Themelore në Prishtinë, më 5 korrik 2019, i kishte shpallur fajtor Ademin dhe Ramën për veprën penale, detyrim në tentativë.

Tash, Ademit i mbetet edhe një instancë për ta apeluar vendimin e dy niveleve gjyqësore – Gjykata Supreme.

Nëse edhe Supremja vendos kundër tij, atëherë burgu është i pashmangshëm për Ademin.

Vetë fjala “burgim efektiv” nënkupton dënim të menjëhershëm prapa grilave, pa të drejtë që koha në burg të shmanget me kaucion me pagesë apo me marrëveshje të tjera që i parasheh ligji. /Periskopi.com/