Zvicëranët insistojnë se Zeqiri do të luajë për ta, Periskopi mëson detaje të bujshme rreth paqartësive

Sulmuesi ende nuk është zyrtarizuar te Brightoni, por klubi ku do të kalojë ai nuk ka qenë tema më e diskutuar në lidhje me të.

Ai u tha se do të luante për ”Dardanët” dhe i ka thënë ”po” Kombëtares që drejtohet nga Bernard Challandes, mirëpo mediet zvicërane po insistojnë se ai ka deklaruar për to se do të vazhdojë me Zvicrën.

Sidoqoftë, burime të Periskopit potencojnë se futbollisti ka nënshkruar parakontratë me Federatën e Futbollit të Kosovës, madje ka pozuar së bashku me liderin e kësaj organizate, Agim Ademin, pas nënshkrimit të marrëveshjes.

Kontrata është nënshkruar në prani të babait të Andit, Avdiut dhe, përkundër ndjesisë gjenerale në audiencë se ai po bën lojëra të dyfishta, ka peshë juridike dhe është e obligueshme të respektohet, ndryshe ndiqen hapat ligjorë.

Sigurisht, janë shumë të kuptueshme dyshimet pasi mediet zvicërane, madje edhe Drejtori i Kombëtares zvicërane, Pierluigi Tami tha së fundmi se ”Zeqiri do të vazhdojë të luajë për Zvicrën”.

Ka shumë pak gjasa, për të mos thënë fare, që ai të luajë kundër Maqedonisë së Veriut, andaj aspak nuk do të ishte befasi nëse ai angazhohet me Kombëtaren U21 të Zvicrës, derisa gjithcka të jetë në rregull me dokumentacion për të veshur fanellën e Kombëtares.

Prandaj, zvicëranët pretendojnë se ai do të vazhdojë të luajë për ta, pasi janë në dijeni se ai mund të angazhohet me U21-shat.

Sidoqoftë, sensacionet dhe cuditë janë të mundura gjithmonë, por bazuar në këto burime mjaft kredibile të Periskopit, Zeqiri do t’i bashkohet së shpejti Kosovës. /Periskopi.com/