Shpërthen Carragher, kritikon ashpër ndeshjen e mbrëmshme të ish- ekipit të tij: Mbrojtja e Liverpool ishte për të qeshur

Jamie Carragher pranon se mbrojtja e Liverpool-it në humbjen turpëruese 7-2 ndaj Aston Villa ishte për të qeshur, me “Reds” që kanë nevojë të adresojnë çështje që mund të bëhen një “trend” i padëshiruar. Legjenda e klubit nga “Anfield” tha për Sky Sports: “Mbrojtja ishte për të qeshur. Nuk mund ta besoja atë që po shihja. Ju nuk mund ta lidhni vërtet këtë me një skuadër si Liverpool. Është një rezultat dhe performancë tronditëse. Sigurisht, më e keqja nën drejtimin e Jurgen Klopp, nuk kam dyshime për këtë.

Dukej shumë herët që Liverpool nuk e filloi mirë këtë ndeshje. Për mua, edhe pse Liverpool ka një rekord të mirë mbrojtës, nuk më pëlqen që përpiqen t’i kapin ekipet kundërshtare jashtë loje. Unë nuk jam dakord me këtë zgjedhje. Duke qenë ish-mbrojtës dhe pasi e kam luajtur atë pozicion vetë, them se kjo skuadër luan shumë më lart në fushë. Liverpool ishte me fat që nuk pësoi golin e tetë apo të nëntë. Natyrisht, nuk mund të jesh shumë kritik ndaj asaj që ka bërë kjo skuadër dhe Jurgen Klopp. Ishte një nga ato rezultate të çmendura që ndodhin, por mendoj se ka vend për t’u alarmuar”.