Sheffieldi i Nuhiut me revolucion në futbollin anglez: Ofron diçka të padëgjuar më herët për fansat

Sheffield Wednesday i Atdhe Nuhiut e ka konfirmuar lëshimin e tiketave sezonale në një formë tejet inovative.

Ky vendim e la audiencën duke kruar kokën, pasi është diçka që nuk është parë më herët, transmeton Periskopi.

Si funksionon?

Klubi ka ofruar një biletë sezonale për 10 vite, që ia mundëson pronarit një ulëse në dekadën e parë të futbollit në Premier League, duke filluar nga sezoni kur klubi do të promovohet në elitën e futbollit anglez.

Derisa të vijë dita e promovimit, fansi që posedon këtë biletë nuk paguan fare për ndeshjet e skuadrës në Championship ose kompeticionet tjera, qoftë edhe nëse promovimi në ligë vonohet për 50 vite.

E jashtëzakonshme, apo jo?

Minimum 15 sezone janë të mbuluara në këtë marrëveshje, që nënkupton se nëse Wednesday do të promovohej në fund të këtij sezoni, pronarët e këtyre biletave 10-vjeçare do të shpërbleheshin me pesë sezone ekstra përveç atyre dhjetë sezoneve që veç i posedojnë.

Nëse klubi siguron promovimin në edicionin 2020/21, fansat me këtë biletë të pazakontë do të marrin bonus katër sezone dhe kështu me radhë.

Bileta më e lirë e këtij lloji, prapa portës, kushton 5,343 euro, ndërsa më e shtrenjta 7,516 euro. /Periskopi.com/