Përgjigje 1 milion dollarëshe: Detajet më pikante nga intervista e sontme e Isa Mustafës

Intervista pak më shumë se një orëshe e Isa Mustafës në RTK, përfundoi me pyetjen e gazetarit se kur do të ndodhë takimi i radhës me Vetëvendosjen ose a do të ketë takim të radhës me Vetëvendosjen, të cilës Mustafa iu përgjigj: Përgjigje 1 milion dollarëshe, sic do të thoshte Lutfi Haziri.

Letra e Albin Kurtit drejtuar sot LDK-së, të cilën nënkryetari i saj Avdullah Hoti e quajti ‘pamflet’ në emisionin Rubikon, duket se ka lënë pak hapësirë për një takim që Vetëvendosje e kërkon si takim ‘jopërfundimtar’. Isa Mustafa thotë se Vetëvendosje tash duhet t’i prejë gjërat.  Ai tha se LDK mbetet e përkushtuar për arritjen e marrëveshjes dhe formimin e institucioneve, por se nuk është barrë e saj ta marrë përgjegjësinë për këtë, ose ‘të sjellet si partia e parë/ fituese’.

Ja disa nga detajet e intervistës së sontme:

-Mustafa rikonfirmoi pozicionin e LDK-së se mbetet në kërkesat e saj, të publikuara dje dhe të debatuara tashmë gjërë e gjatë, thelbi i së cilës ishte: Kryeparlamentari për LDK-në deri në zgjidhjen e Presidentit.

-Mustafa tha se nëse nuk arrihet marrëveshja LDK mbetet në opozitë dhe partisë fituese i mbetet të gjejë partnerë të tjerë. Ai tha se LDK nuk është për zgjedhje të reja sepse ‘qytetarët nuk kanë votuar që të shkohet sërish në zgjedhje port ë bëhet Qeveria’.

-Tha se me Albin Kurtit, në asnjërin prej takimeve të tij, nuk ka folur si me “armik”, por e ka trajtuar si partner politik.

-Për trajtimin e temave si dialogu me Serbinë dhe Gjykata Speciale, ai tha se ‘dialogu është temë që e pret Qeverinë e ardhshme, prandaj nuk është leht sot ta udhëheqësh Qeverinë” e për Specialen shtoi se ‘do të na duhet t’i mbrojmë njerëzit tanë që nesër mund të ballafaqohen me aktakuza’.

-Ai përqeshi deklaratat e Besnik Bislimit lidhur me sjelljet e Agim Veliut gjatë negociatave, duke nënkuptuar se z.Bislimi është një negociator i dobët. “A i tregohet publikut, kur je duke bërë negociata, se njëri këqyrke në të majtë, njëri e mbajke dorën mbi karrigë, njëri u cu doli për nevoja të veta e u kthy prapë’.

-Përfundimi: A do të ketë edhe një takim LDK-VV? Ose, a do të ketë marrëveshje LDK-VV. ‘Përgjigje 1 milion dollarëshe”, tha Isa Mustafa./Periskopi/