Vulini bëhet nervoz për takimin Thaçi – Kitaroviç: I bashkon urrejtja ndaj serbëve

Në një përgjigje për ‘Alo.rs’, Vulin ka thënë se nuk është i befasuar nga një takim i tillë dhe nga deklaratat që janë bërë pas takimit.

“Nuk jam i befasuar nga ky takim dhe nga fjalët mbështetëse që kanë shkëmbyer Thaçi dhe Kolinda, sepse ata janë të lidhur fort pas një ndjenje, urrejtjes ndaj serbëve”, ka thënë Vulin.

Ministri serb, gjithashtu, ka kujtuar edhe deklarata të presidentes kroate të bëra gjatë qëndrimit të saj në Tiranë, ku kishte dhënë se kroatët dhe shqiptarët janë vëllezër.

“Ata e krijuan këtë vëllazëri duke vrarë serbët, dhe këto vite të paqes s’kanë ndryshuar asgjë. Më vjen keq që e vetmja gjë që i bashkon është urrejtja ndaj Serbisë, por kjo nuk është as e re e as e papritur”, ka thënë Vulin, transmeton Express.

Ai thotë se Serbia nuk është në rrezik nga askush dhe se është në të drejtën e çdo populli të bëjë atë që mendon se është më e mira për popullin.

Në takimin me presidenten kroate, Thaçi ka thënë se Prishtina dhe Zagrebi janë shembulli më i mirë i bashkëpunimit.

“Kroacia është shembulli më i mirë i suksesit të Kosovës në rrugën drejt NATO-s dhe Bashkimit Evropian”, kishte deklaruar Thaçi.

Ndërkohë, presidentja kroate ka konfirmuar raportet e shkëlqyera ndërmjet dy shteteve, duke thënë se Kroacia gjithmonë do të jetë në krah të Kosovës.

“Kroacia gjithmonë do të vazhdojë ta mbështesë Kosovën plotësisht”, ka deklaruar Kitaroviq.