Trajneri i Wolvesit e konfirmon lajmin e rëndë për Meritan Shabanin

Trajneri i Wolverhamptonit Nuno Espirito Santo ka shprehur shqetësimet e tij pasi debutuesit Meritan Shabani dhe Bruno Jordao kanë pësuar lëndime në ndeshjen e djeshme të Kupës Karabao ndaj Readingut.

Dy futbollistët e lartëcekur pësuan lëndime në ndeshjen e djeshme, ku Wolves triumfoi vetëm pas penalltive me rezultat 4:2 për të kaluar në fazën tjetër të Kupës Karabao.

“Lëndimi i Shabanit duket më serioz, por tani është duke u analizuar nga stafi mjekësor”, tha fillimisht trajneri portugez.

“Do të shikojmë më pas se çfarë do të ndodhë, por duket lëndim i keq. Nuk e dimë akoma”, potencoi Nuno.

Në lidhje me situatën e Jordao, Nuno tha: “Situata e tij është më ndryshe. Dikush e shkeli atë dhe ai lëndoi paksa kyçin”.

Ndryshe, Shabani kompletoi transferimin te skuadra e Premierligës këtë verë nga Bayern Munich.

Gjithashtu, ferizajasi është njëri prej futbollistëve më të kërkuar nga Përfaqësuesja e Kosovës.