Shkarkimi i Presidentit: Shtëpia e Bardhë publikon bisedën që e bëri Trumpi

Këto transkripta tregojnë se z.Trump i kishte kërkuar Volodymyr Zelenskyt më 25 korrik që të investigonte kandidatin demokrat Joe Biden, djali i të cilit punonte për kompaninë e gazit ukrainas.

Z.Trump i ka ndalur ndihmat ushtarake prej 400 milionë Dollarëve për Ukrainën në mënyrë që të njolloste rivalin e tij politik, z.Biden që po e kryeson garën demokrate për të fituar nominimin për president, shkruan BBC, përkthen Periskopi.

Trumpi kishte premtuar dje se “do të ofronte transkripton e plotë, krejt të paklasifikuar dhe të paredaktuar” të bisedës së 25 korrikut.

Por, detajet që u zbuluan nga Shtëpia e Bardhë sot janë vetëm disa shënime të mbajtura nga zyrtarët amerikanë që e kishin dëgjuar atë.

Këto shënime tregojnë se Trumpi e kishte përmendur Joe Bidenin, i cili si zëvendëspresident amerikan, kishte lobuar në Ukrainë në vitin 2016 për të pushuar nga puna prokurorin kryesor, Viktor Shokinin.

Shokini kishte hapur hetim për Burisman, kompaninë e gazit natyror ku punonte si anëtar bordi Hunter Biden.

Edhe zyrtarë të tjerë perëndimor kishin bërë thirrje për pushimin nga puna të Shokinit për shkak të perceptimit se ishte i butë ndaj korrupsionit.

“Bideni ndaloi përndjekjen dhe shumë njerëz duan të marrin vesh për atë gjë, kështu që, çkado që bëni me prokurorin e përgjithshëm do të ishte shumë mirë. Bideni tha se do të ndalonte përndjekjen kështu që nëse mund të këqyrni më në hollësi, tingëllon shumë mirë për mua.” /Periskopi