Kosovë – Gjibraltar: Periskopi përshëndet vendimin e FFK-së për transparencën në rastin e shitjes së biletave

Periskopi ishte gazeta e vetme online që kritikoi procesin e kaluar të shitjes së biletave, si pasojë e të cilit shumë qytetarë të interesuar për ta parë Kosovën të luante ndaj Çekisë kishin mbetur pa to. Në raportimet e mëhershme ne kishim evidentuar shitjet e biletave në treg të zi, duke nënkuptuar kështu se procesi kishte qenë i kurdisur dhe shumë njerëz apo grupe njerëzish kishin përfituar financiarisht.

Mos-tregimi i orës se kur dilnin në shitje biletat, çeli mundësi të shumta për abuzime nga individë të ndryshëm me të cilët do të duhej të merrej Prokuroria e Shtetit. Ende nuk dihet pse një individ i vetëm kishte pasur emrin në shumë bileta, kur dihet se një qytetari të rëndomtë i lejohet të blejë vetëm një biletë në emër të tij.

Sidoqoftë, Periskopi përshëndet vendimin e FFK-së që kësaj here ta bëj transparent për të gjithë kohën kur fillon shitja e biletave – duke iu dhënë shans të barabartë të gjithëve për të blerë biletën që të shohin Kombëtaren e Kosovës.

Interesimi për të parë ndeshjet e Kosovës është tepër i madh, dhe gazeta jonë vazhdon të shpreh shqetësim në lidhje me abuzime të ndryshme ilegale.

Kosova luan kundër Gjibraltarit më datën 10 tetor.