Futbollisti i Gjilanit pas humbjes nga Prishtina: Humbëm betejen, por jo dhe luftën

Gjilani humbi kryendeshjen e javës së gjashtë përballë Prishtinës në kryeqytet (2:1).

Futbollistët kanë qenë të mërzitur pas ndeshjes në dhomat e zhveshjes, teksa jo vetëm loja e mirë, por edhe mbështetja e madhe që ka ardhur nga tifozët “Skifterat” ka bërë që të besuarit e Gentjan Mezanit të ngriten menjëherë në këmbë.

Njëri prej tyre është edhe Muhamed Useini, mesfushori tetovar i cili pas ndeshjes nuk e dha për të humbur luftën, por vetëm një betejë, teksa theksoi se skuadra e tij është e gatshme për derbi.

“Ne humbëm betejën, por jo dhe luftën. Ne do të rikthehemi edhe më të fortë javën e ardhshme. Jemi gati për derbi”, ka shkruar Useini në llogarinë e tij.

Useini ishte njëri ndër futbollistët më të dalluar në fushën e lojës për kuqebardhët në përballjen me Prishtinën.