Challandes ekzibicional me listën e re: Vendos kundër Avdijajt e Kastratit, fton Dreshevicin dhe Muslijën

Trajneri i Kombëtares së Kosovës në futboll, Bernard Challandes të premten publikoi listën e futbollistëve të ftuar për ndeshjet e shtatorit kundër Republikës së Çekisë dhe Anglisë.

“Dardanët” fillimisht ndeshen me çekët në “Fadil Vokrri” më 7 shtator, derisa tre ditë më vonë udhëtojnë drejt Anglisë ku ndeshen me “Tre Luanët” në “St Mary’s”.

Challandes pati shumë kokëçarje para këtyre sfidave, pasi një numër i madh i futbollistëve janë të lënduar, shkruan Periskopi.

Milot Rashica, Arbër Zeneli, Hekuran Kryeziu, Herolind Shala dhe Benjamin Kololli, të gjithë mungojnë.

Të gjithë emrat e lartëpërmendur, me përjashtim të Shalës, janë pothuajse startues të rregullt te Kombëtarja, dhe kjo e nënvizon më së miri hendikepin që do ta kemi për dy ndeshjet e muajit të ardhshëm.

Mirëpo, për ta freskuar skuadrën, Challandes ka ftuar emra të ri si Florent Muslija dhe Ibrahim Dreshevic, por ka vendosur kundër ftesës së Donis Avdijajt dhe Lirim Kastratit, me gjasë për arsye taktike.

Në anën tjetër, Bernard Berisha është rikthyer në reprezentacion pas një periudhe të gjatë mungese.

Mbetet të shihet se sa të sakta do të jenë zgjedhjet e teknikut zvicëran në dy takimet e ardhshme. /Periskopi.com/