Andin Lokaj: Challandes gaboi rëndë që nuk e ftoi këtë futbollist

“Dardanët” nuk do të mund të llogarisin në shërbimet e Milot Rashicës, Arbër Zenelit, Herolind Shalës, Benjamin Kolollit dhe Hekuran Kryeziut për takimet kundër Çekisë respektivisht Anglisë.

Përveç kësaj, në listën e Bernard Challandesit që u publikua sot, mungon një emër që pritej të ishte në mesin e debutuesve, Lirim Kastrati.

Si të gabuar vendimin e teknikut zvicëran për të mos e ftuar Kastratin e konsideron edhe Lokaj.

“Mungesat janë evidente dhe kjo do të ndihet në lojën e Kombtares tonë, sa i përket mungesës së Kolollit ai është i vetmi që mund të zëvendësohet ngase në krahun e majtë mund të luajë shumë mirë Fidan Aliti ndërsa vendim e tij në qendër mund ta zë Ibrahim Dresheviq që po kalon ditë të mira te Heerenven,” u shpreh Lokaj për Periskopin.

“Problemi më i madh është se si do të duket mesfusha në mungesë të dyshes Kryeziu-Shala të cilët janë mësuar të luajnë bashkë, Valon Berisha rikthehet por moti s’ka lojë, Voca dhe Rashkaj nuk e kanë përvojën dhe nuk e njohin mirë njëri – tjetrin ashtu si Kryeziu me Shalën andaj mesfushën e shoh si problem kur dihet se tani kemi të bëjmë me dy kundërshtarët më të fortë se gjithë të tjerët me të cilët jemi ballafaquar deri më tani.

“Sa i përket fazës së sulmit mendoj që gabimi i Challandes është që e la anash Lirim Kastratin. Në fazën ofenzive kemi lojtarë të cilët mund të zëvendësojnë Rashicën dhe Zenelin, është Florent Muslia që luan në krah e po ashtu mundet edhe Celina në të cilin personalisht shpresoj shumë ngase e njeh mentalitetin e anglezëve, por prapë them që shpejtësia e Kastratit do t’i krynte punë përzgjedhësit në këto dy ndeshje, sidomos në gjysmë orën e fundit të këtyre dueleve shumë të vështira.

“Dhe krejt në fund besoj se mund të nxjerrim diqka duke u bazuar në formën e Vedat Muriqit i cili pa dyshim se është një ndër sulmuesit më në formë në Evropë momentalisht.” /Periskopi.com/