Top 10 zyrtarët më të pasur në Kosovës: Mes tyre edhe Edita Tahiri

Shumica prej tyre bëjnë pjesë edhe në grupin e 10 zyrtarëve  me rritjen më të madhe të pasurisë në tri vitet e fundit. Kështu bëhet e ditur në platformën e krahasimin e pasurisë së zyrtarëve të lartë publik nga viti 2010 deri në vitin 2019, të prezantuar sot nga Lëvizja Fol, ku objekt krahasimi janë rreth 500 zyrtarë publik.

E veçanta e kësaj platforme sipas drejtoreshës Mexhide Demolli, është se mund të bëhet krahasimi i të gjithë zyrtarëve të lartë publikë që nga viti 2010 deri në vitin 2019, duke filluar nga krerët e shtetit, ministrat, deputetët, kryetarët e komunave dhe të gjithë zyrtarëve e tjerë të cilët kanë mbajtur poste publike. Demolli:

“Janë rreth 500 zyrtarë publik të cilët janë në këtë platformë. E veçanta e kësaj platforme është se mund të bëhet krahasimi i gjithë atyre zyrtarëve prej vitit 2010 deri në vitin 2019, për kohën sa ata kanë mbajtur pozita në institucionet shtetërore. Kjo platformë përmes filterave të ndryshëm na mundëson që të bëjmë krahasime, duke filluar nga të gjitha pozitat, që të shohim pasurinë e të gjithëve. Kemi mundësinë të shohim veç pasurinë e deputetëve, janë tri legjislaturat e Kuvendit të Kosovës, tri legjislaturat e fundit ku janë të gjithë deputetët dhe mund të bëjmë edhe krahasime. Legjislatura e katër, pesë dhe gjashtë, do të thotë varësisht çka ne na intereson. Përveç deputetëve, mundësia e krahasimit është edhe tek Qeveria, kemi qeverinë Thaçi 2, e kemi qeverinë Mustafa dhe qeverinë e fundit Haradinaj.

Gjithashtu krahasime mund të bëjmë edhe me kryetarët e komunave”, tha ajo. Duke shpjeguar platformën, Demolli përmendi se në ballinë të saj paraqiten 10 zyrtarët më të pasur në institucionet e Kosovës, të ndarë sipas kategorive të ndryshme.

Risi në këtë platformë, sipas Demollit është kategorizimi i 10 zyrtarëve me burimet më të shumta të të ardhurave.

“Përveç këtyre risi në këtë platformë e kemi edhe 10 zyrtarët me burimet më të shumta të të ardhurave. Kategoritë janë të njëjta, te krerët e shtetit, te deputetët, te ministrat dhe kryetarët e komunave… ajo çka kisha dashtë mu ndalë të kjo pjesë, të burimet e të ardhurave, kemi shumë zyrtarë publikë të cilët posedojnë aksione në shumë kompani, mirëpo nuk paraqesin të ardhurat nga këto kompani në formularët e dorëzuar në Agjencionin Kundër Korrupsion, nuk i paraqesin të ardhurat e tyre si të hyra vjetore, e numri i tyre mund të themi se është mjaft” tha drejtoresha Demolli.

Të dhënat e përdorura  në këtë platformë janë raporte të publikuara nga Agjencia Kundër Korrupsionit, por që këtu na vijnë të ripërpunuara dhe shumë më lehtë të çasshme