Pas një kohe të gjatë jashtë, Oxlade-Chamberlain trego top formë kundër Borussia Dortmundit

Parasezona e Liverpoolit ka marrë vëmendje të madhe para fillimit të edicionit të ri në Premier League.

Pas fitoreve në miqësore kundër Tranmeres dhe Bradfordit, “Të Kuqtë” fluturuan drejt Amerikës ku do të zhvillojnë tri ndeshje përgatitore.

E para ishte kundër Borussia Dortmundit në stadiumin “Notre Dame”, transmeton Periskopi.

Emrat si Virgil van Dijk, Jordan Henderson dhe Trent Alexander-Arnold ishin aktiv për klubin për herë të parë që prej kur ndihmuan skuadrën të triumfojë në Champions League më 1 qershor.

Lajm i mirë ishte edhe rikthimi në aksion i Alex Oxlade-Chamberlainit.

Anglezi pësoi një dëmtim serioz në gju gjatë gjysmëfinales në Champions League kundër Romës në “Anfield”, në prill të vitit të kaluar.

Mesfushori u desh të priste një vit për t’u rikthyer në skuadrën e parë, duke bërë dy paraqitje si zëvendësues në fund të fushatës së kaluar.

A do ta rigjejë formën më të mirë në edicionin 2019/20?

Ai qartazi ka punuar shumë dhe do ta ketë tërë parasezonën në dispozicion derisa po mundohet të rikthehet në planet e Jurgen Kloppit.

Dhe nëse paraqitja e tij kundër Borussia Dortmundit është për t’u marrë parasysh, ai me shumë gjasë po ia arrin qëllimit.

Ox luajti për 60 minuta dhe ishte lojtari më i mirë i Liverpoolit në fushë gjatë humbjes 3-2.

Ai tregoi energji, vrapoi me top dhe dhuroi disa pasime fantastike.

Shikoni përmbledhjen e mëposhtme. /Periskopi.com/