E konfirmon Valoni, nga 1 gushti gati për aksion

Mesfushori i Kombëtares kosovare në një intervistë për “RTV Dukagjini”, është shprehur se do të nis stërvitjen më datë 1 gusht. Gjithashtu Berisha tregoi dhe raportet me lojtarët e tjerë shqiptarë të Lacios si dhe foli për Kombëtaren kosovare.

“Kam qenë për dy muaj në Austri, ku kam kaluar për mrekulli. Atje isha për shkak të rikuperimit nga lëndimi, derisa mjekët më kanë siguruar se çdo gjë po shkon në rrugën e duhur”.

“Nga 1 gushti do t’i bashkohem skuadrës dhe do të jem 100 për qind i gatshëm. Fillimi te Lazio ka qenë i vështirë, pasi ju duhet ta tregoni vetën. Kam raporte të mira me trajnerin dhe bashkëlojtarët, që më kanë pritur mirë”.

Raportet me shqiptarët e Lazios? “Jemi një grup i mirë. Strakosha ka pesë vite që është aty, ka qenë një përkrahje e mirë për mua, pasi kemi kontaktuar para se të shkoja te Lazio. Natyrisht edhe prezenca e Iglit Tares në klub ka qenë një ndihmesë e madhe për mua, pasi me të jam takuar para se ta përfundoja kalimin”.

Kombëtarja? “Me Bullgarinë është dashur të fitojmë, pasi përballjet si vendas të ofrojnë më shumë mundësinë që të marrësh pikë, ndërsa ndeshjet si mysafir janë më të vështira. Mendoj se kemi një shans të mirë që të përfundojmë në vendin e dytë në grup. Anglia është shumë e fortë, por edhe ne jemi të mirë dhe jemi duke shkuar rrugës së duhur. Jemi një ekip i bashkuar dhe mendoj se kjo është gjëja kryesore se përse mund të shpresojmë në suksesin tonë”, përfundoi Berisha.