Prishtina – St Joseph’s: Ajo që pamë sonte në ‘Fadil Vokrri’ veç futboll nuk është

Prishtina ka dhuruar paraqitje zhgënjyese kundër skuadrës nga Gjibraltari, St Joseph’s, të cilën është dashur ta mposhte me nja pesë gola epërsi.

Kryeqytetasit konsideroheshin favoritë absolut derisa kishin një kuotë jashtëzakonisht të ulët për fitore prej 1.20 sipas gjigantit të basteve “bet365”.

Gjithçka u duk se do të shkonte mirë për bardhekaltërit kur Armend Dallku shënoi nga penalltia në minutën e 28-të.

Por ky rezultat zgjati vetëm tre minuta me mysafirët që vunë baraspeshën me anë të Juan Penaloza.

Pjesa e dytë u përshkua nga një lojë tejet e dobët sidomos nga Prishtina, e cila thjesht ishte pa ide.

Përballja ishte aq monotone sa që vështirë se do të vazhdonim ta shikonim në Redaksi, nëse nuk do të ishim të obliguar.

Krejt çka i mbetet ekipit të Mirel Josës është ta kërkojë triumfin në Gjibraltar pas kësaj paraqitje vërtet të dobët.

Në Europa League nuk shkohet me këtë lojë dhe këtë e di secili futbollist i Prishtinës. /Periskopi.com/