Ekskluzive – Shefat Isufi për humbjen kundër Billi Joe Saunders: E kam shkarkuar trajnerin, më përgatiti keq

Boksieri nga Lugina, Shefat Isufi në një intervistë për Periskopin ka zbuluar detaje ekskluzive rreth meçit të cilin e humbi kundër britanikut të njohur, Billy Joe Saunders më 19 maj.

Isufi pati mundësinë të fitonte titullin WBO në peshat super të mesme, por fitorja me vendim unanim i takoi rivalit i cili edhe ashtu konsiderohej favorit para ndeshjes, shkruan Periskopi.

Duhet pranuar se ishte një paraqitje dominuese nga Saunders, derisa në një intervistë për Periskopin, Isufi ka zbuluar detaje befasuese duke thënë se e ka shkarkuar trajnerin pasi nuk e përgatiti si duhet teknikisht.

“Ishte një gabim nga ana e trajnerit që m’ka përgatitë gabim teknikisht dhe nuk ka pasur Plan B,” thotë Isufi.

“Për mu ka qenë e vështirë ta ndryshoj teknikën sepse ashtu m’ka përgatitë katër muaj.”

I pyetur nëse ka marrë masa ndaj këtij trajneri, 29-vjeçari ka shtuar:

“E kam largu nga stafi dhe shpresoj se së shpejti do të gjej trajner më të mirë.”

Rreth meçit të ardhshëm

“Nuk kam plane për meçin e radhës. Do të pauzoj edhe pak.

“Me përgatitje kam fillu, por nuk kam plan për ndeshje. Pas dy muajsh do të shohim.

“Po mendoj pas dy muajve të zhvillojë ndonjë meç.”

A ka ndiku mentalisht humbja kundër Billy Joe Saunders?

“Ka ndiku, jo pse kam humb por ka ndiku shumë sepse nuk kam mund t’i tregoj aftësitë e mia.”

Krejt në fund, Redaksia e Periskopit e ka pyetur boksierin i cili ka një bilanc 27-4-2, nëse ka dëgjuar për meçin e shumëpërfolur mes Petrit Mazrekajt dhe birit të kriminelit serb Arkan dhe çka pret nga ajo ndeshje, dhe ka marrë këtë përgjigje:

“Nuk kam dëgju, por i dëshiroj shumë suksese. Besoj se do të ketë përkrahjen e të gjithë shqiptarëve dhe do të na bëjë krenarë.” /Periskopi.com/