Sonte finalja e madhe londineze në Europa League – gjithçka që duhet të dini para ndeshjes

Kampioni i ri i Europa Leagues do të kurorëzohet të mërkurën në Baku të Azerbajxhanit.

Dy rivalët nga Londra, Arsenali dhe Chelsea përballen në atë që do të jetë një finale e bujshme angleze, shkruan Periskopi.

Triumfi në kompeticion gjithashtu vjen edhe me pjesmarrje në Champions League fushatën e ardhshme, gjë që është pak e rëndësishme për Chelsean pasi “Të Kaltërit” përfunduan në vendin e tretë në tabelën e Premier Leagues këtë edicion.

Mirëpo, sa i përket Arsenalit, trofeu ka rëndësi jetike pasi “Topçinjtë” mbetën jashtë top katërshes.

Ndeshja zhvillohet sonte me fillim nga ora 21:00. Arsenali do të jetë pa Aaron Ramseyn, i cili pritet t’i bashkohet Juventusit këtë verë si transfer i lirë, dhe Henrikh Mkhitaryanin i cili nuk do të udhëtojë për shkak të shqetësimeve për sigurinë e tij.

Mkhitaryan është nga Armenia dhe ky shtet ka probleme të kahmotshme politike me Azerbajxhanin.

Në anën tjetër, Chelsea do të jetë pa shërbimet e Ruben Loftus-Cheek dhe N’Golo Kantes. /Periskopi.com/