“I kërkoj falje secilit fans të Arsenalit nëpër botë”

Mbrojtësi i Arsenalit, Sokratis Papastathopoulos i ka kërkuar falje fansave të skuadrës pasi skuadra e tij u mposht 4-1 nga Chelsea të mërkurën mbrëma, në finalen e Europa Leagues në Baku.

Pas 45 minutave premtues në pjesën e parë, Arsenali u shpartallua në intervalin e dytë, me “Të Kaltërit” që shënuan plot katër herë.

Ky rezultat nënkuptoi se londinezët nuk do të marrin pjesë në Champions League edicionin e ardhshëm, gjë që ka nxitur mbrojtësin grek të kërkojë falje nga të gjithë fansat.

“Ju të gjithë merituat më mirë dhe më vjen keq që nuk mundëm t’iu japim atë që të gjithë e deshëm. Për secilin fans që ishte në Baku dhe rreth botës, na vjen keq. Do të punojmë të përforcohemi edicionin e ardhshëm për t’i dhënë klubit suksesin që e meriton,” tha Sokratis. /Periskopi.com/