Hadërgjonaj, futbollisti që dy vite i thoshte ‘PJO’ Kosovës – Kujtojmë kohën kur refuzonte Dardanët për Zvicrën

Futbollisti i Huddersfield Town, Florent Hadërgjonajn sot është pajisur me pasaportë të Kosovës dhe nga qershori ai pritet të jetë pjesë e skuadrës së udhëhequr nga Bernard Challandes, raporton Periskopi.

Ardhja e tij në Kombëatare padyshim është një plus i madh, pasi Florenti është mjaft i talentuar dhe sigurisht do ta rrisë konkurrencën në skuadër.

Por, 24 vjeçari kishte hezituar më herët që ta zgjidhte Kosovën. Ai gjithnjë tregonte dashuri për vendin e origjinës, por vendosi që t’i përfaqësojë Dardanët vetëm pasi Zvicra nuk po llogariste më në të.

Hadërgjonaj për vite të tëra është kërkuar nga FFK-ja dhe ka pasur bisedime të shumta, derisa vetë futbollisti kishte hezituar fillimisht që t’i jepte përgjigje Kosovës, pasi ëndërronte që të ishte pjesë e Zvicrës në Botërorin që u mbajt vitin e kaluar, por trajneri i Helvetikëve nuk e ftoi atë.

Hadergjonaj u lind në Langnau, Zvicër, nga prindër që kishin emigruar nga Kosova një dekadë më parë për të punuar në një fabrikë të paketimit të mishit. Kur e bëri paraqitjen e parë për Zvicrën në një ndeshje miqësore kundër Bjellorusisë në qershorin e vitit të kaluar, ai ia ka rritur vetes shanset edhe më shumë për të garuar kundër Neymarit në Kupën e Botës gjatë kësaj verës, ku Zvicra nisi kampanjën kundër Brazilit. Megjithatë, shumë njerëz mbeten të zhgënjyer – ata që deshën që Hadergjonaj të luante për Kosovën, shkruante e përditshmja britanike The Guardian në një artikull të publikuar në vitin e kaluar.

Hadërgjonaj fillimisht e kishte refuzuar Kosovën për Zvicrën dhe madje vendimin e tij e kishte cilësuar si shumë të vështirë, ani pse sot ai thotë se është i gatshëm që të luajë për fanellën më të bukur në botë, atë të Kosovës, shkruan Periskopi.

“Ishte vendim i vështirë, ngjashëm siç ishte edhe për lojtarët tjerë, si Xherdan Shaqiri dhe Granit Xhaka”, kishte thënë Hadërgjonaj për The Guardian.

“Edhe ndaj tyre u bë presion. Sa më përket mua, familja ime vjen nga Kosova dhe unë shkoj atje një apo dy herë në vit për t’i vizituar të afërmit. Është situatë e vështirë sepse disa njerëz thonë: ‘E gjithë familja juaj vjen nga Kosova, duhet të luash për ta’ dhe të tjerët thonë: ‘Ti je lindur në Zvicër, duhet të luash për ta’. Lojtarët që ndodhen në këtë pozitë gjithmonë e kanë të vështirë. Unë mendoj se Zvicra më dha mundësinë për t’u rritur dhe të jem, do të thosha, djalosh i mirë; kam kaluar nëpër futbollin zviceran; Zvicra ia dha mundësinë prindërve të mi të krijonin diçka të mirë për vete, të ndërtonin diçka”.

Vetëm pasi humbi vendin e tij te Zvicra dhe nuk ftohej më të Helvetikët përsëri filluan të qarkullonin zërat se ai mund t’i bashkohet Kosovës.

Dhe tani gjithçka ka kuptim kur pas shumë spekulimeve që u bënë me muaj të tërë është vetë futbollisti që ka vendosur të luajë për Kosovën.

“Përshëndetje të dashur miq. Dua që të ju njoftoj se tani sapo kam marrë pasaportën e Kosovës dhe jam gati që të luaj me fanellën më të bukur në botë. Dëshira ime gjithmonë ka qenë të luaj për vendlindjen time, mirëpo është dashur të vije momenti i duhur. Jam grumbulluar edhe nga Zvicra nga të gjitha grupmoshat deri në ekipin e parë. Nga tani, unë Florent Hadergjonaj jam një Dardan plus për trajnerin Bernard Challandes dhe do të jap gjithmonë maksimumin për Kosovën tonë,” ka shkruar Hadërgjonaj sot në Facebook.

Florent, paç fat në Kombëtaren, e cila ashtu siç e ke kuptuar ti tani është më e bukura në botë. Dardanët do të presin ngrohtësisht edhe pse dikur i ke refuzuar./Periskopi/