PSD: Ligji për Dialogun do të kalojë

Dy partitë opozitare, LDK dhe Vetëvendosje kanë paralajmëruar kundërshtimin e Ligjit për Dialogun në çdo mënyrë.

Madje, ata kanë paralajmëruar se këtë Ligj do ta dërgojnë në Kushtetuese, nëse i njëjti kalon.

Për këtë çështje, Periskopi ka kontaktuar Partinë Socialdemokrate, të cilët shprehin bindjen e plotë se ky ligj do të kalojë, pavarësisht paralajmërimeve të dy partive tjera opozitare për kundërshtim.

Zyrtarja për media e kësaj partie, Natyra Kuçi ka thënë për Periskopin se Ligji tashmë ka kaluar në Komisione, dhe se i njëjti është amandamentuar.

Por, që ende nuk e dinë se kur do të futet në rend dite në Kuvend për votim.

“Ligji ka kalu ne komisione dhe është amandamentu. Vjen në Kuvend bashkë me platformën dhe besojmë që do të kalojë, sikurse ka kaluar në lexim të parë”, ka thënë Kuçi për Periskopin.

Projektligji për Dialogun ka më shumë se një muaj që kur është votuar në lexim të parë në Kuvendin e Kosovës.

Ai nuk është paraparë të hidhet në votim në seancat e caktuara nga Kryesia e Kuvendit për këtë javë.

Nënkryetari i Kuvendit Xhavit Haliti ka thënë për “Zërin” se projektligji nuk është pjesë e rendit të ditës në seancat që janë paraparë për këtë javë, por nëse arrin të shqyrtohet nëpër komisione, atëherë me kërkesë të partive parlamentare mund edhe të futet në ndonjë seancë kah fundi i javës./PERISKOPI