KOK ankohet Komitetin Olimpik Ndërkombëtar për Federatën Serbe të Futbollit në Kosovë

KOK-u i i ka konsideruar si ilegale pasi që vetëm Federata e Futbollit të Kosovës është e lejuar të organizojë gara në vend.

Ky Komitet ka kërkuar që edhe Ministria e Punëve të Brendshme, Prokuroria, Gjykatat dhe Ministria për Kulturë, Rini dhe Sport të ndërmarrin veprime të nevojshme për t’i parandaluar aktet e tilla ilegale.

Federata paralele e futbollit në Kosovë ka zhvilluar dje një seancë, ku me vendim unanim të 30 nga 40 anëtarët e asamblesë, është vendosur që Milan Radoiçiq të emërohet kryetar i kësaj federate.

Radoiçiq dyshohet se është i përfshirë në vrasjen e politikanit serb, Oliver Ivanoviq. Tani, ai është në arrati, pasi që po kërkohet nga Policia e Kosovës.

Njoftimi i plotë i Komitetit Olimpik të Kosovës:

Komiteti Olimpik i Kosovës me shqetësim të madh ka pritur veprimin ilegal të dalë nga strukturat serbe, siç janë zgjedhjet e organeve të reja paralele në Kosovë të të ashtuquajturës “Federata Serbe e Futbollit në Kosovë”.

Për Komitetin Olimpik të Kosovës është e papranueshme që në territorin e Kosovës të bëhen veprime të tilla kundërligjore, që janë në kundërshtim edhe me Kartën Olimpike dhe të cilat vazhdojnë të dalin nga strukturat ilegale serbe.

Bazuar në Statutin e KOK-ut, Komiteti Olimpik i Kosovës njeh vetëm një federatë për një sport që organizon gara në territorin e Kosovës dhe ajo është Federata e Futbollit e Kosovës. Si e tillë, çdo federatë tjetër e formuar në Kosovë është ilegale.

Andaj, Komiteti Olimpik i Kosovës, këto veprime ilegale do t’i raportojë në Komitetin Olimpik Ndërkombëtar, në mënyrë që KON-i të ndërmarrë hapa konkret në Komitetin Olimpik të Serbisë, Federatën e Futbollit të Serbisë, e cila po ndërhynë në funksionimin e sportit në Kosovë përmes veprimeve ilegale, si dhe në organizatat ndërkombëtare që qeverisin me futbollin, UEFA e FIFA, në mënyrë që të parandalohen një herë e përgjithmonë strukturat ilegale sportive në Kosovë.

Po ashtu, KOK ju bënë thirrje Ministrisë së Punëve të Brendshme të Kosovës, Prokurorisë dhe Gjykatave, si dhe Ministrisë për Kulturë, Rini e Sport, që të ndërmarrin veprimet e nevojshme sipas Ligjit për Sport dhe legjislacionit tjetër në fuqi, për t’i parandaluar aktet e tilla ilegale, të cilat e dëmtojnë sportin e Kosovës.

KOK mbështet Federatën e Futbollit të Kosovës, si organi i vetëm qeverisës me futbollin në vendin tonë dhe çdo veprim tjetër kundër ligjor jashtë veprimit të FFK-së, konsiderohet i paligjshëm, i papranueshëm dhe i dënueshme nga ne, dhe si të tilla nuk do të kenë asnjë pasojë juridike në sportin e Kosovës.