Zyrtare: Armand Duka zgjidhet anëtar i Komitetit Ekzekutiv të UEFA-s

Një vit më parë Duka fitoi garën më të fortë për postin e presidentit të FSHF përballë një rivali që e cilësoi hapur si mbeshtetje të qeverisë, ndërsa sot kruen i FSHF-së siguroi një mandat në Komitetin Ekzekutiv të UEFA-s duke siguruar 36 vota nga 55 të mundshme.

Duka kandidonte kundër 8 kundërshtarëve për 7 vende në Komitetin Ekzekutiv, pasi Boranbajev i Kazakistanit kishte vendosur që të tërhiqte kandidaturën e tij një ditë para Kongresit. Kreu i FSHF-së u rendit në vendin e 6-të në bazë të votave.

VOTAT

Shandor Csanai – Hungari 49

Luis Rubiales – Spanjë 47

Davor Shuker – Kroaci 47

Fernando Gomes – Portugali  45

Jesper Mëler Kristensen – Danimarkë 40

Armand Duka – Shqipëri 36

Andri Pavelko – Ukrainë 27.

Kjo është hera e parë që futbolli shqiptar do të përfaqësohet nga presidenti Duka në qeverinë europiane.

Po cilat janë detyrat dhe përgjegjësitë e një anëtari të Komitetit Ekzekutiv në UEFA?

Komiteti Ekzekutiv i UEFA-s është organizmi ekzekutiv suprem i UEFA-s. Përbëhet nga Presidenti UEFA-s dhe 16 anëtar të tjerë, nga të cilët të paktën një femër, që zgjidhen nga Kongresi i UEFA-s, dy anëtar zgjidhen nga Shoqata e Klubeve Europianë (ECA) dhe një anëtar që zgjidhet nga Ligat Europiane, të ratifikuara nga Kongresi, të gjithë me të njëjtat të drejta dhe detyra si të gjithë anëtarët e tjerë të Komitetit Ekzekutiv.

Anëtarët dhe zëvëndëspresidenti

Komiteti Ekzekutiv nuk mund të ketë më shumë se një anëtar nga një federatë që është anëtare e UEFA-s. Ky rregull nuk aplikohet për anëtaret femra ose për anëtarët e Komitetit Ekzekutiv të zgjedhur nga ECA dhe Ligat Europiane.

Çdo anëtar i Komitetit Ekzekutiv, me përjashtim të Presidentit dhe anëtarëve të gjinisë femërore, ka një rol aktiv (përshembull president, zëvëndëspresident, sekretar i përgjithshëm ose administrator i deleguar) në Federatën respektive. Komiteti Ekzekutiv zgjedh një zëvendës president të parë, katër zëvendës president të tjerë nga propozimet e Presidentit të UEFA-s. Presidenti mund ti japë funksione specifike ndaj cilitdo nga zëvendës presidentët.

Zgjatja e mandatit

Mandati i Presidentit dhe i anëtarëve të Komitetit Ekzekutiv të zgjedhur në Kongres ka një kohëzgjatje katër vjeçare. Tetë anëtarë dhe presidenti, zgjidhen çdo dy vite. Zgjatja e mandatit të dy anëtarëve të Komitetit Ekzekutiv të zgjedhur nga ECA dhe nga Ligat Europiane është katër vjeçare. Asnjë person nuk mund të jetë president ose anëtar i Komitetit Ekzekutiv më shumë se tre mandate, si radhazi por edhe të ndarë. Nuk mund të zgjidhen anëtarë me moshë mbi 70 vjeç.

Nëse një vend lihet vakant, në Kongresin e zakonshëm të radhës zgjidhet një anëtar zëvendësues deri në fund të mandatit të atij që largohet. Nëse vendi lihet vakant gjatë vitit të fundit të mandatit nuk zgjidhen anëtarë zëvendësues. Mandati i presidentit dhe anëtarëve të Komitetit Ekzekutiv fillon me mbylljen e kongresit në të cilin zgjidhen dhe përfundon në mbyllje të kongresit në të cilin zëvendësuesit zgjidhen dhe ratifikohen.

Pushteti

Komiteti Ekzekutiv mund të adoptojë rregulla dhe vendime mbi të gjitha çështjet që nuk kanë të bëjnë në juridiksionin legal ose statutor të Kongresit të UEFA-s ose të një organi tjetër. KE administron UEFA-n, me përjashtim të rasteve kur të tilla aktivitete janë deleguar, ose disa detyra menaxhimi i janë deleguar nga Statutet e UEFA-s presidentit të UEFA-s ose Administratës UEFA.